hai tere kaan zulf-e-muimbar lagii hu_ii

hai tere kaan zulf-e-muimbar lagii hu_ii
rakkhegii ye na baal baraabar lagii hu_ii

[muimbar = fragrant]

baiThe bhare hue hai.n Khum-e-mai kii tarah ham
par kyaa kare.n ke muhar hai muu.Nh par lagii hu_ii

mayyat ko Gusal diijo na Khaak_saar kii
hai tan pe Khaak-e-kuchaa-e-dil_bar lagii hu_ii

[mayyat = dead body; Gusal = bath]

nikale hai kab kisii se bhii us kii mizhaa kii nok
hai phaa.Ns sii kaleje ke andar lagii hu_ii

[mizhaa = eyelash]

ai 'Zauq' dekh duKhtar-e-raz ko na muu.Nh lagaa
chhuTatii nahii.n hai muu.Nh se ye kaafir lagii hu_ii

[duKhtar = daughter; raz = vine]
[duKhatr-e-raz = daughter of the (grape) vine = wine]