kitanii pii kaise kaTii raat mujhe hosh nahii.n
Rahat Indori

kitanii pii kaise kaTii raat mujhe hosh nahii.n
raat ke saath ga_ii baat mujhe hosh nahii.n

mujh ko ye bhii nahii.n maaluum ki jaanaa hai kahaa.N
thaam le ko_ii meraa haath mujhe hosh nahii.n

aa.Nsuo.n aur sharaabo.n me.n guzar hai ab to
mai.n ne kab dekhii thii barasaat mujhe hosh nahii.n

jaane kyaa TuuTaa hai paimaanaa ki dil hai meraa
bikhare bikhare hai.n Khayaalaat mujhe hosh nahii.n