vo firaaq aur vo visaal kahaa.N
Mirza Ghalib

vo firaaq aur vo visaal kahaa.N
vo shab-o-roz-o-maah-o-saal kahaa.N

thii vo ik shaKhs ke tasavvur se
ab vo raa.Nnaaii-e-Khayaal kahaa.N

[tasavvur=imagination, raa.Nnaaii-e-Khayaal=tender thoughts]

aisaa aasaa.N nahii.n lahuu ronaa
dil me.n taaqat jigar me.n haal kahaa.N

[haal=spiritual ecstasy]

fikr-e-duniyaa me.n sar khapaataa huu.N
mai.n kahaa.N aur ye vabaal kahaa.N

[vabaal=calamity]