dushman ko bhii siine se lagaanaa nahii.n bhuule
Sagar Azmi

dushman ko bhii siine se lagaanaa nahii.n bhuule
ham apane buzurgo.n kaa zamaanaa nahii.n bhuule

tum aa.Nkho.n kii barasaat bachaaye huye rakhanaa
kuchh log abhii aag lagaanaa nahii.n bhuule

ye baat alag haath kalam ho gaye apane
ham aap ki tasviir banaanaa nahii.n bhuule

ik umr hu_ii mai.n to ha.Nsii bhuul chukaa huu.N
tum ab bhii mere dil ko dukhanaa nahii.n bhuule