dhuaa.N banaake fizaa me.n u.Daa diyaa mujhako
Nazeer Baqri

dhuaa.N banaake fizaa me.n u.Daa diyaa mujhako
mai.n jal rahaa thaa kisii ne bujhaa diyaa mujhako

kha.Daa huu.N aaj bhii roTii ke chaar harf liye
savaal ye hai kitaabo.n ne kyaa diyaa mujahko

safed saa.ng kii chaadar lapeT kar mujh par
fasiil-e-shahar pe kisane sajaa diyaa mujhako

mai.n ek zarraa bula.ndii ko chhuune nikalaa thaa
havaa ne tham ke zamii.n par giraa diyaa mujhako