aaj jaane kii zid na karo
Faiyyaz Hashmi

aaj jaane kii zid na karo 
yuu.N hii pahaluu me.n baiThe raho
haaye mar jaaye.nge ham to luT jaaye.nge 
aisii baate.n kiyaa na karo 

tum hii socho zaraa kyuu.N na roke tumhe.n 
jaan jaatii hai jab uThake jaate ho tum 
tum ko apanii qasam jaan-e-jaa.N 
baat itanii merii maan lo 

vaqt kii qaid me.n zindagii hai magar 
chand gha.Diyaa.N yahii hai.n jo aazaad hai 
in ko kho kar abhii jaan-e-jaa.N 
umr bhar na tarasate raho 

kitanaa maasuum-o-rangiin hai ye samaa 
husn aur ishq kii aaj meraaj hai 
kal ki kis ko Khabar jaan-e-jaa.N 
rok lo aaj kii raat ko