zamii.n pe rah ke damaaG aasmaa.N se milataa hai
Shamim Jaipuri

zamii.n pe rah ke damaaG aasmaa.N se milataa hai 
kabhii ye sar jo tere aastaa.N se milataa hai 

isii zamii.n se isii aasmaa.N se milataa hai 
ye kaun detaa hai aaKhir kahaa.N se milataa hai 

sunaa hai luuT liyaa hai kisii ko rahabar ne 
ye vaaqyaa to merii daastaa.N se milataa hai 

dar-e-habiib bhii but-kadaa bhii kaabaa bhii 
ye dekhanaa hai sukuu.N kahaa.N se milataa hai 

talab na ho to kisii dar se kuchh nahii.n milataa 
agar talab ho to dono.n jahaa.N se milataa hai 

vahii.n chalo vahii.n ab ham bhii haath phailaaye.n 
"Shamim" saare jahaa.N ko jahaa.N se milataa hai