ishq me.n Gairat-e-jazbaat ne rone na diyaa
Sudarshan Faakir

ishq me.n Gairat-e-jazbaat ne rone na diyaa
varnaa kyaa baat thii kis baat ne rone na diiyaa

aap kahate the ke rone se na badale.nge nasiib
umr bhar aap kii is baat ne rone na diiyaa

ronevaalo.n se kah do un kaa bhii ronaa role.n
jin ko majabuuri-e-haalaat ne rone na diiyaa

tujh se milakar hame.n ronaa thaa bahut ronaa thaa
tangi-e-vaqt-e-mulaaqaat ne rone na diiyaa

ek do roz kaa sadamaa ho to ro le.n 'Faakir'
ham ko har roz ke sadamaat ne rone na diiyaa