ai muhabbat tere anjaam pe ronaa aayaa
Shakeel Badayuni

ai muhabbat tere anjaam pe ronaa aayaa
jaane kyo.n aaj tere naam pe ronaa aayaa

yuu.N to har shaam ummiido.n me.n guzar jaatii thii
aaj kuchh baat hai jo shaam pe ronaa aayaa

kabhii taqadiir kaa maatam kabhii duniyaaa kaa gilaa
manzil-e-ishq me.n har gaam pe ronaa aayaa 

jab huaa zikr zamaane me.n mohabbat kaa 'Shakeel'
mujh ko apane dil-e-naakaam pe ronaa aayaa