har baat yahaa.N baat ba.Dhaane ke liye hai

har baat yahaa.N baat ba.Dhaane ke liye hai
ye umr jo dhokaa hai to khaane ke liye hai

ye daaman-e-hasarat hai vahii Khvaab-e-gurezaa.N
jo apane liye hai na zamaane ke liye hai

[gurezaa.N = fleeing]

utare hue chehare me.n shikaayat hai kisii kii
ruuThii hu_ii rangat hai manaane ke liye hai

Gaafil terii aa.Nkho.n kaa muqaddar hai andheraa
ye farsh to raaho.n me.n bichhaane ke liye hai

[Gaafil = careless/unaware]

ghabaraa na sitam se na karam se na adaa se
har mo.D yahaa.N raah dikhaane ke liye hai