Meg Index | October 2001 Index

Date: 24-Oct-2001
Poet: Ahmed Faraz


'Faraz' ab ko_ii saudaa ko_ii junuu.N bhii nahii.n 
magar qaraar se din kaT rahe ho.n yuu.N bhii nahii.n 

lab-o-dahan bhii milaa guftaguu kaa fan bhii milaa 
magar jo dil pe guzaratii hai kah sakuu.N bhii nahii.n 

[lab = lips; dahan = mouth; guftaguu = conversation]
[fan = art/skill]

merii zubaa.N kii luknat se bad_gumaa.N na ho 
jo tuu kahe to tujhe umr bhar miluu.N bhii nahii.n 

[luknat = stammering; bad_gumaa.N = suspicious]

'Faraz' jaise ko_ii diyaa turbat-e-havaa chaahe hai 
tuu paas aaye to mumkin hai mai.n rahuu.N bhii nahii.n 

[turbat = grave/tomb]