Home | May 2000 Index

Date: 8-May-2000
Poet: 'Ashufta' Changezi


ye bhii nahii.n biimaar na the
itane junuu.N aasaar na the

logo.n kaa kyaa zikr kare.n
ham bhii kam ayyaar na the

[ayyaar = cunning]

ghar me.n aur bahut kuchh thaa
sirf dar-o-diivaar na the

sab par ha.Nsanaa shevaah thaa
jab tak Khud us paar na the

[shevaah = nature/behaviour]

terii Khabar mil jaatii thii
shahar me.n jab aKhbaar na the

[aKhbaar = newspaper]

pahale bhii sab kuchh bikataa thaa
Khvaabo.n ke baazaar na the

maut  kii baate.n pyaarii thii.n
marane ko tayyaar na the


--------------------------------------------------
Mehfil-e-Gazal Archive:
http://www.geocities.com/urdu_poetry/

Urdu Poetry Archive:
http://www.urdupoetry.com

E-mail your queries to moderator@urdupoetry.com
--------------------------------------------------