Home | April 2000 Index

Date: 17-Apr-2000
Poet: Nida Fazli


Today's poem is taken from Nida Fazli's book of 
poems titled "Khoya Hua Sa Kuchh".

kahii.n chhat thii diivaar-o-dar the kahii.n
milaa mujhako ghar kaa pataa der se
diyaa to bahut zi.ndagii ne mujhe
magar jo diyaa vo diyaa der se

[dar = door]

huaa na ko_ii kaam maamuul se
guzaare shab-o-roz kuchh is tarah
kabhii chaa.Nd chamakaa Galat vaqt par
kabhii ghar me.n suuraj ugaa der se

[maamuul = custom/practice; shab-o-roz = night and day]
[Galat = wrong]

kabhii ruk gaye raah me.n besabab
kabhii vaqt se pahale ghir aa_ii shab
huye ba.nd daravaaze khul khul ke sab
jahaa.N bhii gayaa mai.n gayaa der se

[besabab = without reason]

ye sab ittifaaqaat kaa khel hai
yahii hai judaa_ii yahii mel hai
mai.n mu.D mu.D ke dekhaa kiyaa duur tak
banii vo Khaamoshii sadaa der se

[ittifaaqaat = chance occurrences]

sajaa din bhii raushan hu_ii raat bhii
bhare jaam laharaa_ii barasaat bhii
rahe saath kuchh aise haalaat bhii 
jo honaa thaa jaldii huaa der se

bhaTakatii rahii yuu.N hii har ba.ndagii
milii na kahii.n se ko_ii raushanii
chhupaa thaa kahii.n bhii.D me.n aadamii
huaa mujh me.n raushan Khudaa der se


-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------