Home | March 2000 Index

Date: 31-Mar-2000
Poet: Shamim Jaipuri 

A ghazal from Begum Akhtar's Rare Moments album:


ilaahii kaash Gam-e-ishq kaam kar jaaye 
jo kal guzaranii hai mujh pe abhii guzar jaaye 

[ilaahii = God]

tamaam umr rahe ham to Khair kaa.NTo.n me.n 
Khudaa kare teraa daaman gulo.n se bhar jaaye 

[tamaam = entire]

zamaanaa ahal-e-Khirad se to ho chukaa maayuus 
ajab nahii.n ko_ii diivaanaa kaam kar jaaye 

[ahal = resident/inhabitant; Khirad = intelligence; maayuus = disappointed]

hamaaraa hashr jo kuchh huaa, huaa lekin 
duaa ye hai ki terii aaqabat sa.Nvar jaaye 

[aaqabat = future life]

nigaah-e-shauq vahii hai nigaah-e-shauq "Shamim" 
jo ek baar ruKh-e-yaar par Thahar jaaye 

[ruKh = face]

-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------