Home | October '99 Index

Date: 14-Oct-99
Poet: Qamar Jalalwi

Some sources claim the poet of this Gazal to be
Muzaffar Akbarabadi. Perhaps someone who knows
for sure, can resolve the issue.


ai mere ham-nashii.n chal kahii.n aur chal
is chaman me.n ab apanaa guzaaraa nahii.n
baat hotii gulo.n tak to sah lete ham
ab to kaa.NTo.n pe bhii haq hamaaraa nahii.n

aaj aaye ho tum kal chale jaaoge
ye muhabbat ko apanii gavaaraa nahii.n
umr bhar kaa sahaaraa bano to bano
do gha.Dii kaa sahaaraa sahaaraa nahii.n

de.n sadaa daar par aur kabhii tuur par
kis jagah mai.n ne tum ko pukaaraa nahii.n
Thokare.n yuu.N khilaane se kyaa faayedaa
saaf kah do ke milanaa gavaaraa nahii.n

gulasitaa.N ko lahuu kii zaruurat pa.Dii
sab se pahale hii gardan hamaarii kaTii
phir bhii kahate hai.n mujh se ye ahal-e-chaman
ye chaman hai hamaaraa tumhaaraa nahii.n

zaalimo.n apanii qismat pe naazaa.N na ho
daur badalegaa ye vaqt kii baat hai
vo yaqiinan sunegaa sadaa_e.n merii
kyaa tumhaaraa Khudaa hai hamaaraa nahii.n

apanii zulfo.n ko rukh se haTaa liijiye
meraa zauq-e-nazar aazamaa liijiye
aaj ghar se chalaa huu.N yahii soch kar
yaa to nazare.n nahii.n yaa nazaaraa nahii.n