Home | July '99 Index

Date: 5-Jul-99
Poet: Sagar Siddiqui

baat phuulo.n kii sunaa karate the
ham kabhii sher kahaa karate the

mashaale.n leke tumhaare Gam kii
ham a.ndhero.n me.n chalaa karate the

ab kahaa.N aisii tabiyat vaale
choT khaa kar jo duaa karate the

tark-e-ehasaas-e-muhabbat mushkil
haa.N magar ahal-e-vafaa karate the

bikharii bikharii zulfo.n vaale
qaafile rok liyaa karate the

aaj gulshan me.n shaguuf-e-saaGar
shaikave baad-e-sabaa se karate the