mai.n so rahaa thaa aur ko_ii bedaar mujh me.n thaa

mai.n so rahaa thaa aur ko_ii bedaar mujh me.n thaa 
shaayad abhii talak meraa pindaar mujh me.n thaa 

[bedaar=awake; pindaar=pride] 

vo kaj_adaa sahii merii pahachaan bhii thaa vo 
apane nashe me.n mast jo fan_kaar mujh me.n thaa 

[kaj-adaa=crooked; fanakaar=artiste] 

mai.n Khud ko bhuulataa bhii to kis tarah bhuulataa
ik shaKhs thaa ki aa_iinaa bar_daar mujh me.n thaa 

[aa_iinaa bar_daar=bearing a mirror] 

shaayad usii sabab se tavaazun-saa mujh me.n hai 
ik muhatasib liye hue talavaar mujh me.n thaa 

[sabab=reason; tavaazun=balance; muhatasib=one who stops] 

apanii kisii amal pe nidaamat nahii.n mujhe 
thaa nek dil bahut jo gunaah_gaar mujh me.n thaa 

[amal=work/deed; nidaamat=repentance/regret]