aane vaale nasale.n tum pe rashk kare.ngii ham_asiiro.n 
jab un ko ye dhyaan aayegaa tum ne Firaq ko dekhaa thaa 

ham se kyaa ho sakaa muhabbat me.n 
Khair tum ne to bevafaa_ii kii 

aaj unhe.n mehar_baa.N paa kar 
Khush hue aur jii me.n Dar bhii gaye 

tum muKhaatib bhii ho qariib bhii ho 
tum ko dekhuu.N ki tum se baat karuu.N 

Kharaab hoke uThaa huu.N terii nigaaho.n se 
mai.n sochataa huu.N duniyaa sa.Nvar ga_ii hogii 

maasuum hai muhabbat lekin isii ke haatho.n 
ai jaan-e-ishq mai.n ne teraa buraa bhii chaahaa 

qaid kyaa rihaa_ii kyaa hai hamii.n me.n har aalam 
chal pa.De to seharaa hai ruk gaye to zindaa.N hai 

shaame.n kisii ko maa.Ngatii hai.n aaj bhii 'Firaq' 
go zindagii me.n yuu.N to mujhe ko_ii kamii nahii.n 

na ko_ii vaadaa na ko_ii yaqii.n na ko_ii ummiid 
magar hame.n to teraa intazaar karanaa thaa