Ashaar #038 - 'sharm-o-hayaa'

Date: 25-Nov-2001
Topic: 'sharm-o-hayaa'


Contributed by Quresh:
---------------------

kabhii nekii bhii us ke jii me.n aa jaaye hai mujh se
jafaaye.n kar ke apanii yaad sharmaa jaaye hai mujh se
[Mirza Ghalib]

ye bhii naachaar jii kaa khonaa hai
sharm se paanii paanii honaa hai
[Mirza Ghalib]

Gair ko yaarab vo kyo.n kar manaa-e-gustaaKhii kare
gar hayaa bhii us ko aatii hai to sharmaa jaaye hai
[Mirza Ghalib]

husn aur us pe husn-e-zan rah ga_ii bul_havas kii sharm
apane pe etimaad hai Gair ko aazamaaye kyuu.N
[Mirza Ghalib]

[bul_havas = excessive desires; etimaad = trust]


Contributed by Ali Firdausi:
---------------------------

aa.Nkh me.n thii hayaa har mulaaqaat par
surKh aariz hue vasl kii baat par
us ne sharmaa ke mere savaalaat par
aise gardan jhukaa_ii mazaaa aa gayaa
[Unknown]


Contributed by Pramod Shersia:
-----------------------------

sharm ek adaa-e-naaz hai apane hii se sahii
hai.n kitane be-hijaab ki hai.n yuu.N hijaab me.n
[Mirza Ghalib]

dono.n jahaa.N deke vo samajhe ye Khush rahaa
yaa.N aa pa.Dii ye sharm ki takaraar kyaa kare.n
[Mirza Ghalib]

kis qadar hai.n terii aa.Nkhe.n bebaak
in se fitane bhii hayaa karate hai.n
[Daag Dehlvi]

[bebaak = bold; fitane = mischief]

zindagii ye to nahii.n tujh ko sa.Nvaaraa hii na ho
kuchh na kuchh ham ne teraa karz utaaraa hii na ho
sarm aatii hai us shahar me.n hai.n ke jahaa.N
naa mile bhiik to laakho.n kaa guzaaraa hii na ho
[Jan Nissar Akhtar]

bikher de jo vo zulfo.n ko apane mukha.De par
to maare sharam ke aa_ii hu_ii ghaTaa phir jaaye
[Unknown]

duniyaa se jaa rahaa huu.N kafan me.n chhipaaye muu.Nh
afasos baad marane ke aa_ii hame.n hayaa
[Unknown]


Contributed by Asim Kumar:
-------------------------

sharm se aa.Nkh milaate nahii.n dekhaa un ko
paar hotii hai.n kaleje ke nigaahe.n kyo.n kar
[Daag Dehlvi]

izhaar-e-mohabbat par is tarah vo sharmaaye
sab kii hayaa merii aa.Nkho.n me.n utar aa_ii
[Moen Ahsan Jazbi]

hazaaro.n shauq-o-armaa.N le rahe hai.n chuTakiyaa.N dil me.n
hayaa un kii ijaazat de to kuchh bebaakiyaa.N kar luu.N
[Akhtar Shirani]


Contributed by Syed Hasan:
-------------------------

kis ne hayaa se niichii nazar kii ki ho gayaa
aasaa.N na dekhanaa mujhse dushvaar dekhanaa
[Muhammad Zaki]

hayaa ne rok liyaa jazb-e-dil ne khii.nch liyaa
chale vo tiir kii suurat khii.nche kamaa.N kii tarah
[Daag Dehlvi]



And now, for some more ashaar on sharm-o- hayaa from 
yours truly:

shukr parde hii me.n us but ko hayaa ne rakkhaa
varnaa iimaan gayaa hii thaa Khudaa ne rakkhaa
[Zauq]

kah uThe chup kyo.n ho visaal ke baad
Khud hii sharmaaye is savaal ke baad
[Riaz Khairabadi]

sharmaa ke puuchhanaa vo kisii kaa shab-e-visaal
ai hijr ab to dil kii tamannaa nikal ga_ii
[Hijr Shahjahanpuri]

ik roz is tarah bhii mere baazuo.n me.n aa
mere adab ko terii hayaa kii Khabar na ho
[Ahmed Nadeem Qasmi]

ik arz-e-vafaa bhii kar na sake
kuchh kah na sake kuchh sun na sake
yaa.N ham ne zabaa.N hii kholii thii
vaa.N aa.Nkh jhukii sharmaa bhii gaye
[Majaz]

vo lajaaye mere savaal par ki uThaa sake na jhukaa ke sar
u.Dii zulf chehare pe is tarah ki shabo.n ke raaz machal gaye
[Majrooh Sultanpuri]

sharmaa ke yuu.N na dekhiye lillaah baar baar
aisaa na ho ki pyaar ke chashme ubal pa.De.n
[Sahir Bhopali]

vo aa_iine me.n dekh rahe the bahaar-e-husn
aayaa meraa Khayaal to sharmaa ke rah gaye
[Zauq]

vo sharmaaye baiThe hai.n gardan jhukaaye
Gazab ho gayaa ik nazar dekh lenaa
[Hasrat Mohani]

dil le gayaa hai meraa vo siim_tan churaakar
sharmaa ke jo chale hai saaraa badan churaakar
[Mussahfi]


-----------------------------------------------------------
Hope you enjoyed these ashaar! The next topic is very 
frequently found in Urdu poetry. Here is a hint:

hijr kii raat kaaTane vaale
kyaa karegaa agar sahar na hu_ii


Yes, the topic is 'hijr/judaa_ii/firaaq/furqat'. 
Please send in your favourite ashaar on this topic 
by December 15th, 2001 to moderator@urdupoetry.com
Looking forward to hearing from you.

Before we leave, just wanted to ley you all know that 
membership in the Ashaar list just crossed the 1000 mark 
:-) 

-----------------------------------------------------------