Ashaar #017 - 'bosaa'

Date: 30-Aug-2000
Topic: 'bosaa'


Last topic of the week was 'bosaa' (kiss). I received a lot of 
ashaar from various subscribers. Thank you so much for sharing 
these with us. First, some ashaar by Mirza Ghalib:


Contributed by Abhay Ghaisas:
----------------------------

Gair le.n mahafil me.n bose jaam ke
ham rahe.n yuu.N tashnaalab paiGaam ke
[Mirza Ghalib]

[tashnaalab = thirsty]


bosaa dete nahii.n aur dil pe hai har lahajaa nigaah
jii me.n kahate hai.n muft aa_e to maal achchhaa hai
[Mirza Ghalib]


sohabat me.n Gair kii na pa.Dii ho kahii.n ye Khuu
dene lagaa hai bosaa baGair iltijaa kiye
[Mirza Ghalib]

[sohabat = company; Khuu = habit; iltijaa = pleading]


dikhaake jumbish-e-lab hii tamaam kar ham ko
na de jo bosaa to muu.Nh se kahii.n javaab to de
[Mirza Ghalib]

[jumbish = movement]


Some more by Ghalib:
-------------------

kyaa Khuub tum ne Gair ko bosaa nahii.n diyaa
bas chup raho hamaare bhii muu.Nh me.n zabaan hai
[Mirza Ghalib]

bosaa kaisaa ye hii Ganimat hai 
ke na samajhe vo lazzat-e-dushnaam 
[Mirza Ghalib]

[Ganiimat = blessing; lazzat = deliciousness; dushnaam = abuse]


Here are some ashaar on a special type of 'bosaa' :-)

aa.Nkhe.n merii talavo.n se mal jaa_e to achchhaa
hai hasarat-e-paa-bos nikal jaa_e to achchhaa
[Zauq]

jaan kar sotaa tujhe vo qasa-e-paabosii meraa
aur teraa Thukaraa ke sar vo muskuraanaa yaad hai
[Hasrat Mohani]

yaar thaa gulazaar thaa baad e sabaa thii mai.n n thaa
laayaq e paabos e jaa.n kyaa hinaa thii mai.n n thaa
[Bahadur Shah Zafar]

karate ho mujhako manaa-e-qadam_bos kis liye 
kyaa aasmaa.N ke bhii baraabar nahii.n huu.N mai.n 
[Mirza Ghalib] 


And now for some more ashaar on 'bosaa' by other poets:

Contributed by Abhay Ghaisas:
----------------------------

kahii.n bose kii mat jurrat dilaa! kar baiThiyo un se 
abhii is had ko vo kaifii nahii.n hoshiyaar baiThe hai.n 
[Insha]

[jurrat = boldness; dilaa = O heart] 


bose kii hai to Khvaahish par kahiye kyo.n ke us se
jis se mizaaj-e-lab par harf-e-savaal baa.Ndhe
[Mirza Sauda]


kyaa taab kyaa majaal hamaarii ki bosaa le.n
lab ko tumhaare lab se milaakar kahe baGair
[Bahadur Shah Zafar]


Contributed by Deepak Purohit:
-----------------------------

bosaa jo ruKh kaa nahii.n dete lab kaa diijiye
hai ye misl-e-phuul nahii.n panKha.Dii sahii
[Zauq]

saadagii dekh ki bose kii havas rakhataa huu.N
jin labo.n se ki mayassar nahii.n dushnaam mujhe
[Mussafi]

ko_ii muu.Nh chuum legaa is nahii.n par
shikan rah jaa_egii yuu.N hii jabii..n par
[Riaz Khairabadi]


shaq un ko thaa ki raat me.n bosaa na le ko_ii
gaalo.n pe rakh ke soye kalaa_ii tamaam raat
[Unknown]

le lo bosaa apanaa vaapas kis liye takaraar kii
kyaa ko_ii jaagiir ham ne chhiin lii sarakaar kii
[Akbar Meeruti]

dhamakaa ke bosaa luu.Ngaa ruKh-e-rashk-e-maah kaa
chandaa vasuul hotaa hai saahab dabaav se
[Akbar Allahabadi]


aaj bose un ke gin gin ke liye
din gine jaate the is din ke liye
[Qavi Amrohi]

bosaa dene me.n jo puuchhaa ki biga.Dataa kyaa hai
bole lene mai.n kaho aap ko milataa kyaa hai
[Unknown]

bosaa jo talab mai.n ne kiyaa ha.Ns ke vo bole
ye husn kii daulat hai luTaa_ii nahii.n jaatii
[Unknown]

lipaTaa jo bosaa leke to bole ki dekhiye
ye duusarii Khataa hai vo pahalaa qusuur thaa
[Unknown]

ek bose ke talab-gaar hai.n ham
aur maa.Nge to gunah-gaar hai.n ham
[Zar Azeemabadi]

kand-e-lab kaa un ke bosaa be-taqalluf le liyaa
gaaliyaa.N khaa_ii.n balaa se muu.Nh to miiThaa ho gayaa
[Maftoon Dehlvi]


The topic for next week is 'Khat' (letter). If you would like to 
share your favourite ashaar on this topic, please e-mail them to 
urdu_poetry@hotmail.com by September 6th.