Home | Index of Poets Ganesh Bihari Tarz

duniyaa banii to hamd-o-sunaa ban ga_ii Gazal


duniyaa banii to hamd-o-sunaa ban ga_ii Gazal 
utaraa jo nuur nuur-e-Khudaa ban ga_ii Gazal 

guu.Njaa jo naad_brahm banii raqs-e-mahar-o-maah 
zarre jo thar-tharaaye sadaa ban ga_ii Gazal 

chamakii kahii.n jo barq to ehasaas ban ga_ii 
chhaa_ii kahii.n ghaTaa to adaa ban ga_ii Gazal 

aa.Ndhii chalii to qahar ke saa.Nche me.n Dhal ga_ii 
baad-e-sabaa chalii to nashaa ban ga_ii Gazal 

haivaan bane to bhuuk banii bebasii banii 
insaan bane to jazb-e-vafaa ban ga_ii Gazal 

uThaa jo dard-e-ishq to ashko.n me.n Dhal ga_ii 
bechainiyaa.N ba.Dii to duaa ban ga_ii Gazal 

zaahid ne pii to jaam-e-panaah ban ke rah ga_ii 
rindo.n ne pii to jaam-e-baqaa ban ga_ii Gazal 

arz-e-dakkan me.n jaan to dilli me.n dil banii 
aur shahar lakhanau me.n hinaa ban ga_ii Gazal 

dohe rubaa_ii nazme.n sabii 'Tarz' the magar 
asnaaf-e-shaayarii kaa Khudaa ban ga_ii Gazal 

Contributed by Ramesh Hariharan

Home | Index of Poets Ganesh Bihari Tarz
Maintained by Nita Awatramani
URL: http://www.urdupoetry.com
Last updated on: 25th May, 2001