tere jalave ab mujhe har suu nazar aane lage
Saba Afghani

tere jalave ab mujhe har suu nazar aane lage
kaash ye bhii ho ke mujh me.n tuu nazar aane lage

ibtadaa ye thii ke dekhii thii Khushii kii ek jhalak
intahaa ye hai ke Gam har suu nazar aane lage

beqaraarii ba.Dhate ba.Dhate dil kii fitarat ban gaii
shaayad ab taskiin kaa pahaluu nazar aane lage

Khatm karade ae 'Sabaa' ab shaam-e-Gam kii daastaa.N
dekh un aa.Nkho.n me.n bhii aa.Nsuu nazar aane lage