tabiiyat in dino.n begaanaa-e-Gam hotii jaatii hai
Jigar Moradabadi

tabiiyat in dino.n begaanaa-e-Gam hotii jaatii hai 
mere hisse kii goyaa har Khushii kam hotiii jaatii hai 

vahii hai shaahid-o-saaqii magar dil bujhataa jaataa hai 
vahii hai shammaa lekin raushanii kam hotii jaatii hai 

qayaamat kyaa ye ai husn-e-do aalam hotii jaatii hai 
ke mahafil to vahii hai dil_kashii kam hotii jaatii hai 

vahii maiKhaana-o-sahabaa vahii saaGar vahii shiishaa 
magar aavaaz-e-noshaanosh maddham hotii jaatii hai 

vahii hai zindagii lekin 'Jigar' ye haal hai apanaa 
ke jaise zindagii se zindagii kam hotii jaatii hai