sar me.n saudaa bhii nahii.n dil me.n tamannaa bhii nahii.n
Firaq Gorakhpuri

sar me.n saudaa bhii nahii.n dil me.n tamannaa bhii nahii.n
lekin is tark-e-muhabbat kaa bharosaa bhii nahii.n

yuu.N to hangaame uThaate nahii.n diivaanaa-e-ishq
magar ai dost kuchh aiso.n kaa Thikaanaa bhii nahii.n

muddate.n guzarii.n terii yaad bhii aa_ii na hame.n
aur ham bhuul gaye ho.n tujhe aisaa bhii nahii.n

muu.Nh se ham apane buraa to nahii.n kahate ke 'Firaq'
hai teraa dost magar aadamii achchhaa bhii nahii.n