kis se puuchhe.n ham ne kahaa.N vo cheharaa-e-raushan dekhaa hai
Taskeen Qureshi

kis se puuchhe.n ham ne kahaa.N vo cheharaa-e-raushan dekhaa hai
mahafil mahafil Dhuu.NDh chuke hai.n gulashan gulashan dekhaa hai

kis ko dekhe.n kis ko na dekhe.n phuul bhii hai.n kaliyaa.N bhii magar
jis se lagaa_ii aa.Nkh usii ko dil kaa dushman dekhaa hai

rang-e-bahaar-e-subah-e-gulistaa.N kyaa dekhe vo diivaanaa
jis kii nazar ne ek hii gul me.n saaraa gulashan dekhaa hai

ahl-e-vafaa kii Khuun kii chhii.nTe.n duur tak u.D kar jaatii hai.n
meraa ta.Dapanaa dekhanevaale apanaa bhii daaman dekhaa hai 

aaj unhe.n jo chaahe samajh lo varnaa yahii 'Taskeen' hai.n jinhe.n 
kal tak ham ne kuu-e-butaa.N me.n Khaak_ba_daaman dekhaa hai