shaam-e-firaaq ab na puuchh aa_ii aur aa ke Tal ga_ii
Faiz Ahmed Faiz

shaam-e-firaaq ab na puuchh aa_ii aur aa ke Tal ga_ii
dil thaa ke phir bahal gayaa jaa.N thii ke phir sambhal ga_ii

bazm-e-Khayaal me.n tere husn kii shamaa jal ga_ii
dard kaa chaa.Nd bujh gayaa hijr kii raat Dhal ga_ii

jab tujhe yaad kar liyaa subah mahak mahak uThii 
jab teraa Gam jagaa liyaa raat machal machal ga_ii 

dil se to har muaamalaa kar ke chale the saaf ham
kahane me.n un ke saamane baat badal badal ga_ii

aaKhir-e-shab ke ham-safar 'Faiz' na jaane kyaa hue
rah ga_ii kis jagah sabaa subah kidhar nikal ga_ii