shikavaa-e-izataraab kaun kare
Shakeel Badayuni
shikavaa-e-izataraab kaun kare
apanii duniyaa Kharaab kaun kare
[shikavaa=complaint; izataraab=anxiety]
gin to lete hai.n u.ngaliyo.n pe gunaah
rahamato.n kaa hisaab kaun kare
[gunaah=sin; rahamato.n=(acts of) kindness]
ishq kii talKh kaamiyo.n ke nisaar
zindagii kaamayaab kaun kare
[talKh=bitter; kaamiyo.n=failures (naakaamiyo.n)]
daavat-e-mayakashii un aa.Nkho.n me.n
jurrat-e-izataraab kaun kare
[jurrat=dare]
dil kaa aa_iinaa saamane laakar
tujh ko teraa javaab kaun kare
ham se mayakash jo taubaa kar baiThe.n
phir ye kaar-e-savaab kaun kare
[kaar=work; savaab=heavenly reward for a good deed]
Garq-e-jaam-o-sharaab hoke 'Shakeel'
shuGl-e-jaam-o-sharaab kaun kare
[Garq=to drown in; shuGl=to be busy with/lost in]