laakho.n kii sunaa tum ne taqadiir sa.Nvaarii hai
Syed Shafaz Shah Chishti
laakho.n kii sunaa tum ne taqadiir sa.Nvaarii hai
mujh se yahii kah dete ab ke terii baarii hai
Daalii hai nazar jab se ek nashaa saa taarii hai
kyaa ko_ii parii saaqii shiishe me.n utaarii hai
[taarii=spreading/happening]
kyaa us ko rijhaaye.nge jannat ke hasii.n jalve
dahaliiz tere dar kii jis shaKhs ko pyaarii hai
[rijhaanaa=to please/charm; jannat=heaven]
[jalvaa=splendour/display/show; dahaliiz=threshold]
virase me.n milii ham ko shaahii bhii faqiirii bhii
aur Gam to "Shafaq" goyaa jaagiir hamaarii hai
[virase=inheritance/heritage; shaahii=royalty]
[faqiirii=poverty/humility; goyaa=as if; jaagiir=property/estate]