dil mat Tapak nazar se ki paayaa na jaayegaa
Mohammed Rafi Sauda

dil mat Tapak nazar se ki paayaa na jaayegaa
jyo.n ashk phir zamii.n se uThaayaa na jaayegaa

ruKhsat hai baaGabaa.N ki Tuk ek dekh le chaman
jaate hai.n vaa.N jahaa.N se phir aayaa na jaayegaa

teG-e-jafaa-e-yaar se dil sar na pheriyo
phir muu.Nh vafaa ko ham se dikhayaa na jaayegaa

daaman-e-daaG-e-teG jo dhoyaa to kyaa huaa
aalamke dil se daaG haTaayaa na jaayegaa

kaabaa agarche TuuTaa to kyaa jaa-e-Gam hai shaiKh
kuchh qasr-e-dil nahii.n ki banaayaa na jaayegaa

zaalim mai.n kah rahaa thaa ki tuu is Khuu.N se dar guzar
"Sauda" kaa qatl hai ye chhupaayaa na jaayegaa

Home | Index of Poets


Last updated on 7th March, 1999