yaad nahii.n kyaa kyaa dekhaa thaa saare manzar bhuul gaye
Nazeer Baqri

yaad nahii.n kyaa kyaa dekhaa thaa saare manzar bhuul gaye
us kii galiyo.n se jab lauTe apanaa bhii ghar bhuul gaye

Khuub gaye pardes ki apane diivaar-o-dar bhuul gaye
shiish-mahal ne aisaa gheraa miTTii ke ghar bhuul gaye

tujh ko bhii jab apanii qasame.n apane vaade yaad nahii.n
ham bhii apane Khvaab terii aa.Nkho.n me.n rakh kar bhuul gaye

mujh ko ji.nho.ne qatl kiyaa hai ko_ii u.nhe.n batalaaye "Nazeer"
merii laash ke pahaluu me.n vo apanaa Khanjar bhuul gaye

Home | Index of Poets


Last updated on 13th March, 2000