Home | February '99 Index

Date: 19-Feb-99
Poet: Sufi Ghulam Mustafa Tabassum

nazar me.n Dhal ke ubharate hai.n dil ke afasane
ye aur baat hai duniyaa nazar na pahachane

ye bazm dekhii hai merii nigaah ne ki jahaa.N
baGair shama bhii jalate rahe hai.n paravaane

ye kyaa bahaar kaa jauban hai ye kyaa nashaat kaa ra.ng
fasurdaa mayakade vaale udaas mayaKhaane

mere nadiim teri chashm-e-iltafaat kii Khair
biga.D biga.D ke sa.Nvarate gaye hai.n afasaane

ye kis kii chashm-e-fusuu.Nsaaz kaa karishmaa hai
ki Tuut kar bhii salaamat hai.n dil ke butaKhaane