Home | January '99 Index

Date: 1-Feb-99
Poet: Firaq Gorakhpuri

maut ik giit raat gaatii thii 
zi.ndagii jhuum-jhuum jaatii thii

rote jaate the tere hijr nasiib
raat furqat  kii Dhalatii jaatii thii 

[furqat = separation]

tere un aa.Nsuuo.n kii yaad aa_ii
zi.ndagii jin me.n muskuraatii thii

zikr thaa ra.ng-o-buu kaa au' dil me.n
terii tasviir utaratii jaatii thii

dard-e-hastii chamak uThaa jis me.n
vo ham ahal-e-vafaa kii chhaatii thii

zi.ndagii ko vafaa kii raaho.n me.n
maut Khud raushanii dikhaatii thii

saamane tere jaise ko_ii baat
yaad aa-aa ke bhuul jaatii thii

vo teraa Gam ho yaa Gam-e-duniyaa
shamma-sii dil me.n jhil-milaatii thii

zi.ndagii zi.ndagii ko vaqt-e-safar
kaaravaa.N-kaaravaa.N chhupaatii thii