na raastaa na ko_ii Dagar hai yahaa.N

na raastaa na ko_ii Dagar hai yahaa.N 
magar sab kii qismat safar hai yahaa.N 

sunaa_ii na degii dilo.n kii sadaa 
dimaaGo.n me.n vo shor-o-shar hai yahaa.N 

havaao.n kii u.Ngalii paka.D kar chalo 
vasilaa ik yahii motabar hai yahaa.N 

na is shahar-e-behis ko seharaa kaho 
suno ik hamaaraa bhii ghar hai yahaa.N 

palak bhii jhapakate ho "Makhmoor" kyuu.N 
tamaashaa bahut muKhtasar hai yahaa.N