mere aa.Nsuuo.n pe nazar na kar meraa shikavaa sun ke Khafaa na ho
Kaif Akrami
mere aa.Nsuuo.n pe nazar na kar meraa shikavaa sun ke Khafaa na ho
use zindagii kaa bhii haq nahii.n jise dard-e-ishq milaa na ho
ye inaayate.n ye navaazishe.n mere dard-e-dil kii davaa nahii.n
mujhe us nazar kii talaash hai jo adaa shanaas-e-vafaa na ho
tujhe kyaa bataauu.N mai.n beKhabar ki hai dard-e-ishq me.n kyaa asar
ye hai vo latiif sii kaifiyat jo zubaa.N tak aaye adaa na ho
ye sharaab rez-e-hasii.n ghaTaa jo hai "Kaif" naazish-e-mayakadaa
kisii tashnaa-kaam kii aarazuu kisii tashnaa-lab kii duaa na ho