Home | Index of Poets Jigar Moradabadi

dil me.n kisii ke raah kiye jaa rahaa huu.N mai.n


dil me.n kisii ke raah kiye jaa rahaa huu.N mai.n 
kitanaa hasii.n gunaah kiye jaa rahaa huu.N mai.n 

duniyaa-e-dil tabaah kiye jaa rahaa huu.N mai.n 
sarf-e-nigaah-o-aah kiye jaa rahaa huu.N mai.n 

fard-e-amal siyaah kiye jaa rahaa huu.N mai.n 
rahamat ko bepanaah kiye jaa rahaa huu.N mai.n 

[fard-e-amal=life's paper; siyaah=blacken; bepanaah=limitless] 

aisii bhii ik nigaah kiye jaa rahaa huu.N mai.n 
zarro.n ko mahar-o-maah kiye jaa rahaa huu.N mai.n 

mujh se lage hai.n ishq kii azamat ko chaar chaa.Nd 
Khud husn ko gavaah kiye jaa rahaa huu.N mai.n 

maasuumi-e-jamaal ko bhii jis pe rashk ho 
aise bhii kuchh gunaah kiye jaa rahaa huu.N mai.n 

aage qadam ba.Dhaaye.n ji.nhe.n suujhataa nahii.n 
raushan chiraaG-e-raah kiye jaa rahaa huu.N mai.n 

tanaqiid-e-husn maslahat-e-Khaas-e-ishq hai 
ye jurm gaah-gaah kiye jaa rahaa huu.N mai.n 

gulashan_parast huu.N mujhe gul hii nahii.n aziiz 
kaa.NTo.n se hii nibhaah kiye jaa rahaa huu.N mai.n 

yuu.N zi.ndagii guzaar rahaa huu.N tere baGair 
jaise koii gunaah kiye jaa rahaa huu.N mai.n 

mujh se adaa huaa hai 'Jigar' justajuu kaa haq 
har zarre ko gavaah kiye jaa rahaa huu.N mai.n 

Additions by Aman

Home | Index of Poets Jigar Moradabadi
Maintained by Nita Awatramani
URL: http://www.urdupoetry.com
Last updated on: 16th October, 2001