Home | Index of Poets Hasrat Mohani

dekhanaa bhii to u.nhe.n duur se dekhaa karanaa


dekhanaa bhii to u.nhe.n duur se dekhaa karanaa 
shevaa-e-ishq nahii.n husn ko rusavaa karanaa 

[shevaa=tradition/way] 

ik nazar hii terii kaafii thii ki ai raahat-e-jaan 
kuchh bhii dushvaar na thaa mujh ko shakebaa karanaa 

[raahat=relief; shakebaa=console/to make one patient] 

un ko yaa.N vaade pe aa lene de ai abr-e-bahaar 
jis tarah chaahanaa phir baad me.n barasaa karanaa 

[yaa.N=here] 

shaam ho yaa ki sahar yaad unhii.n kii rakh le
din ho yaa raat hame.n zikr unhii.n kaa karanaa

kuchh samajh me.n nahii.n aataa ki ye kyaa hai 'Hasrat'
un se milakar bhii na izhaar-e-tamannaa karanaa 

Home | Index of Poets Hasrat Mohani
Maintained by Nita Awatramani
URL: http://www.urdupoetry.com
Last updated on: 25th February, 2003