Home | Index of Poets Gulzar

qadam usii mo.D par jame hai.n


qadam usii mo.D par jame hai.n 
nazar sameTe hue kha.Daa huu.N 
junuu.N ye majabuur kar rahaa hai palaT ke dekhuu.N 
Khudii ye kahatii hai mo.D mu.D jaa 
agarche ehasaas kah rahaa hai 
khule dariiche ke piichhe do aa.Nkhe.n jhaa.Nkatii hai.n 
abhii mere intazaar me.n vo bhii jaagatii hai 
kahii.n to us ke goshaa-e-dil me.n dard hogaa 
use ye zid hai ki mai.n pukaaruu.N 
mujhe taqaazaa hai vo bulaa le 
qadam usii mo.D par jame hai.n 
nazar samete hue kha.Daa huu.N 

[Khudii = self respect; dariichaa = window]
[goshaa = corner; taqaazaa = demand]

Home | Index of Poets Gulzar
Maintained by Nita Awatramani
URL: http://www.urdupoetry.com
Last updated on: 22nd November, 2001