Home | Index of Poets Ahmed Faraz

gile fuzuul the ahad-e-vafaa ke hote hue


gile fuzuul the ahad-e-vafaa ke hote hue 
so chup rahaa sitam-e-naaravaa ke hote hue 

ye qurbato.n me.n ajab faasale pa.De ki mujhe 
hai aashnaa kii talab aashnaa ke hote hue 

vo hilaagar hai.n jo majabuuriyaa.N shumaar kare.N 
chiraaG ham ne jalaaye.N havaa ke hote huye 

na kar kisii pe bharosaa ke kashtiyaa.N Duubii.n 
Khudaa ke hote huye naaKhudaa ke hote huye 

kise Khabar hai ki kaasaa-ba-dast phirate hai.n 
bahut se log saro.n par humaa ke hote hue 

'Faraz' aise bhii lamhe.n kabhii kabhii aaye 
ki dil giriftaa rahaa dil_rubaa ke hote hue 

Home | Index of Poets Ahmed Faraz
Maintained by Nita Awatramani
URL: http://www.urdupoetry.com
Last updated on: 20th May, 2001