Sudarshan Faakir


shaayad mai.n zindagii kii sahar leke aa gayaa
Sudarshan Faakir

shaayad mai.n zindagii kii sahar leke aa gayaa
qaatil ko aaj apane hii ghar leke aa gayaa

taa-umr Dhuu.NDhataa rahaa ma.nzil mai.n ishq kii
a.njaam ye ki gard-e-safar leke aa gayaa

nashtar hai mere haath me.n, kaa.ndho.n pe maiqadaa
lo mai.n ilaaj-e-dard-e-jigar leke aa gayaa

'faakir' sanamakade me.n na aataa mai.n lauTakar
ik zaKhm bhar gayaa thaa idhar leke aa gayaa

Home | Index of Poets


Last updated on 24th December, 1997