Home | Index of Poets Jaun Eliya

Khaamoshii kah rahii hai kaan me.n kyaa


Khaamoshii kah rahii hai kaan me.n kyaa 
aa rahaa hai mere gumaan me.n kyaa 

[gumaan=thought] 

ab mujhe ko_ii Tokataa bhii nahii.n 
yahii hotaa hai khaanadaan me.n kyaa 

bolate kyo.n nahii.n mere haq me.n 
aabale par gaye zubaan me.n kyaa 

[aabale=blisters] 

merii har baat be-asar hi rahii 
nuqs hai kuchh mere bayaan me.n kyaa 

[nuqs=fault; bayaan=method of expression] 

vo mile to ye puuchhanaa hai mujhe 
abhii huu.N mai.n terii amaan me.n kyaa 

[amaan=security] 

shaam hii se dukaan-e-diid hai ba.nd 
nahii.n nukasaan tak dukaan me.n kyaa 

yuu.n jo takataa hai aasamaan ko tuu 
ko_ii rahataa hai aasamaan me.n kyaa 

ye mujhe chain kyuu.N nahii.n pa.Dataa 
ik hii shaKhs thaa jahaan me.n kyaa 

[chain=contentment] 

Contributed by Irfan Sattar

Home | Index of Poets Jaun Eliya
Maintained by Nita Awatramani
URL: http://www.urdupoetry.com
Last updated on: 15th September, 2001