dil pe karate hai.n dimaaGo.n pe asar karate hai.n
Baqar Zaidi

dil pe karate hai.n dimaaGo.n pe asar karate hai.n
ham ajab log hai.n zehano.n me.n safar karate hai.n

jab saraape pe kahii.n us ke nazar karate hai.n
miir saahab kii tarah umr basar karate hai.n

ba.ndishe.n ham ko kisii haal gavaaraa hii nahii.n
ham to vo log hai.n diivaar ko dar karate hai.n

vaqt ki tez-Kharaamii hame.n kyaa rokegii
ja.nbish-e-kalk se sadiyo.n kaa safar karate hai.n

naqsh-e-paa apanaa kahii.n raah me.n hotaa hii nahii.n
sar se karate hai.n mohim jab ko_ii sar karate hai.n

ham-nashii.n Khuub hai ye mahafil-e-yaaraa.N ke yahaa.N
vo saliqaa hai ke aibo.n ko hunar karate hai.n

kyaa kahe.n haal teraa ai mutamaddin duniyaa
ja.nvar bhii nahii.n karate jo bashar karate hai.n

ham ko dushman kii bhi taqliif gavaaraa na hu_ii
log ehabaab se bhii sarf-e-nazar karate hai.n

marqado.n pe to charaaGaa.N hai shab-o-roz magar
umr kuchh log a.dhero.n me.n basar karate hai.n

tazakaraa miir kaa Gaalib kii zabaa.N tak aayaa
aitaraaf-e-hunar, arbaab-e-hunar karate hai.n

Home | Index of Poets


Last updated on 11th December, 1998